內地三中全會細則陸續公佈，中資股全線開派對，唔少內銀內險券商股升幅動輒一成，墟冚程度拍得住當年直通車。根據經紀戰友回報，大部份散戶依然冇出手，意味過千億銀成交，好多都屬於基金盤，相信後市再上難度不大。睇圖表，恒指已突破23500重大阻力，要見25000絕對不是夢。早前叫大家衝穿28蚊可追嘅海螺水泥（914），短線可等31蚊食糊。
大市進入爆炒mode，認真花多眼亂，如果諗唔到買乜板塊，不妨考慮惠理集團（806），呢隻由金手指謝清海主理嘅公司，手持大量優質中資股，當中唔少持續創出52周新高，包括上海醫藥（2607）、中煉化（2386）、四環（460）、合富輝煌（733）等，絕對係升市大贏家。
今年中資股出名難炒，H指今年仍報跌1.1%，但惠理皇牌基金——惠理價值基金A截至上周五錄得近6%（未計及噚日大升市），明顯跑贏大市，揀股功力毋庸置疑，價格肯定更因此而水漲船高。事實上，該股beta值達1.4，睇好大市可繼續破關，惠理乃不二之選。
睇圖表，惠理已成功突破今年以來嘅下降軌，成交量更創逾兩年新高，澎湃非常，可候回試5元樓下吸納，中線坐六望七。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange