湖人無大將，佐敦希爾當先鋒！湖人巨星拜恩（Kobe）幾時復出，就連教練迪安東尼都唔知。冇咗球隊支柱嘅「洛城1哥」周日喺主場對活塞，靠無名小卒佐敦希爾貢獻職業生涯最高24分、17個籃板，以114:99擊敗客隊，贏得近6戰中第2場勝利。
佐敦希爾其實喺09/10年球季仲係新秀嗰時，效力過紐約人，而當時主帥就係迪安東尼。不過，迪帥冇乜用過佢，打咗24場波就將佢送到火箭。佐敦希爾咁就浮浮沉沉幾個球季，今季多得拜恩、尼殊都因傷缺陣，而且今季加盟嘅新兵基文冇料到，所以近4場迪帥都畀佢打正選。
迪帥：Kobe條路仲好長
今仗佐敦希爾攻入全場最高24分，同成場餵波畀佢嘅比歷克交出16次助攻，湖人最後以15分擊敗全場罰球17射7中嘅活塞。賽後佐敦希爾話𠵱家上陣時間多咗，信心加強：「每次我上陣信心都會更強。冇咗尼殊同拜恩，球友都知道要再加把勁幫球隊贏波，比以往更加團結。」迪帥都讚：「佐敦希爾好努力，亦好有才華。我覺得佢現時更有自信，我會畀佢更多上陣時間。」
至於拜恩幾時復出，迪帥就話太多變數：「現時太多嘢唔可以肯定，Kobe參與練習係第一步，但係條路仲好長，所以我哋要更小心。」
足本收睇《亂噏24》x 楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24