猶記得當年中學嘅4社啦啦隊，美其名係為運動場上選手打氣，實質看台上嘅4個小分區，至真正係女生爭妍鬥麗嘅修羅場。要成為眾人焦點總要有一套「撒手鐧」，何況你嘅對手除咗自己友外，仲有另外3個社嘅小花。不過喺日前上海作客山西嘅CBA戰場上，一班為球隊打氣嘅「上海姑娘」就合演了一幕姊妹情深，動人與否就見仁見智喇。
事緣着咗火嘅上海隊外援韋弗今仗極為神勇， 單節已取得15分，最後助球隊以111:102擊敗山西。不過投入過頭，飛身救波時令場邊嘅攝影機壓倒旁邊嘅啦啦隊美女，上海baby左腳受傷後已表情扭曲，更秒速爆喊，其他姊妹見狀紛紛圍住隊友問候傷勢。
當然，各位寶貝都爭住照顧傷者，最後呢位美女需要用擔架抬離場（圖），送院檢查，當時隻左腳就紮住咗（小圖）。當中不乏好姊妹圍住擔架陪喊，相信連韋弗見到呢一幕都嚇親，中國人果然重情！
文：呂晨
以女性角度看球星新聞，唔用眉筆用原子筆寫低球壇百態！
足本收睇《亂噏24》x楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24