木薯資源（841）上年11月29號派半年度成績單。睇睇日曆，新一期半年度業績，好快又會公佈，買定木薯等漲爆。
木薯8月尾發盈喜，股價一路好地地，但係10月21號打後，五棍陰燭插咗最多23%。同一日，集團公佈以當日收市價0.85元，大折讓19%，即每股0.685元配股。慘跌原因，完全唔關業績事。
木薯呢次配售4,980萬股咁大把，就算以現價（0.84元）計，市值都係得4,180萬銀。又單係上星期五，木薯成交2,020萬股，已經相當於配股股數嘅40%，要消化有幾難？更何況，木薯嚟緊有盈嘉跟尾？
斷估承貨人甚至想博埋全年盈喜，食鋪大茶飯，大家惜貨如金就真。唔信？呢批配股，啱啱係兩個星期前出街，之後，一路都未質穿過配股價。
又根據泰國商務局估計，今年木薯片出口會創新高，去到224億港銀。當局亦指出，木薯片價量齊升，一個好重要原因，係以木薯製造乙醇等新能源燃料嘅需求上升。祖國係泰國乾木薯片最大進口商，糧食需求係其一，空氣污染勁嚴重，阿爺講明環保，要引入木薯製造乙醇，祖國對進口泰國木薯片，相信只會有增無減。木薯既係祖國最大乾木薯進口商，絕對肥仔水。
預期PE僅4倍
木薯上年度，船隻減值2,480萬銀後，純利3,060萬銀。本年度再冇呢項減值，純利已經上到5,540萬銀，來回大幅增長80%。連埋肥仔水優勢，估木薯本年度純利上到9,000萬銀，大幅增長1.9倍，連配股攤薄，EPS0.21元，預期PE得4倍。又木薯呢兩日成交先行，聞到鑊氣。睇佢翻一番到1.68元，PE得8倍。
錢雋
細價股專家
本欄逢周二、五刊出
足本收睇《亂噏24》x 楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24