華光船務後人、趙世光女兒趙式和近年致力藝術與慈善工作，最近她獲奶奶李顏玉秀的支持，捐出旗下品牌Magaschoni的羊絨衣飾到其畫廊售賣，收益將捐給協康會。
延續奶奶信念
式和昨日在灣仔其創立的Scipian畫廊接受訪問，她說：「因為呢個牌子係我先生屋企人嘅，我同媽咪（何琍琍）都有幫襯開，奶奶覺得我哋係知音，所以都好支持，呢個project傾咗大半年，因為奶奶好關注自閉症小朋友，佢哋好需要關心，今次可以延續奶奶嘅message。」
下月聖誕節是式和最期待的節日，今年她努力為慈善工作，過得特別有意義，她說：「忙完呢個慈善活動，下月會有藝術展，到聖誕就可以放吓假，一年裏面我最期待嘅節日係聖誕，每年屋企都會交換禮物，媽咪會將屋企佈置得好靚，有好大嘅聖誕樹，我哋一齊佈置。
「到時會有火雞、布甸、好靚嘅蠟燭，仲會播聖誕歌，我哋會用好靚嘅餐具，都係爸爸媽媽結婚時朋友送嘅，平時唔捨得用，喺呢啲特別日子用，我哋會dress up，好有氣氛。」
父親病情穩定
父親三年前中風後一直鮮有露面，式和透露父親身體穩定：「好stable，慢慢嚟，我會盡量抽時間陪佢，好彩我哋兄弟姊妹多，可以輪住陪佢。每逢聖誕、新年大日子，都會抽時間返屋企。」
採訪：盧妹
攝影：陳志嵐
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！