大記者為扶助家中姊弟帶四位菲傭回鄉救災一事，忙中兩三日，都唔記得咗小學校友會之55周年校慶聚餐一事，呢樣不難理解，今年係中文大學五十校慶，慶祝活動進入高潮，聚會與演講一項接着一項，大記者參加過兩三次母校新聞系嘅講座（如王維基嗰次），還有不少活動聚餐佢想參加，如十一月二十一日黃昏之中央圖書館有二百五十名校友之藝術作品展，包括沈校長與饒公嘅作品，十一月二十二日晚之文化中心中大音樂會，李歐梵教授做客座音樂指揮，沈校長上台參與合唱獅子山下，唉吔，還有今天（十八日）下午五時半在中大康本國際學術園之諾貝爾經濟學獎得獎人Joseph Stightz在中大演講，大記者問左丁山：「Stightz有乜咁巴閉？」呢位大教授以前在史丹福，教過中大前副校長廖柏偉，現於哥倫比亞大學，在思想光譜上，屬於「左左地」一派，主張政府適當「干預市場」，「全球化」帶來好大代價之類，總之唔係獅子山學會嗰杯茶，梁振英及其智囊應該搵佢傾吓偈，吸收世界一流干預派學者嘅思維，勝於自己閉門造車，連解釋不發牌俾王維基之經濟理由，都大出洋相。
大記者唔記得小學校55週年聚會箒，佢嘅老師何萬森就記得噃，搵人提醒佢盡量搵時間出席十一月二十三日星期六之「東院道官立學校五十五週年校慶聚餐」，在利舞台廣場20樓玉桃軒舉行，大記者話：「真係好唔得閒，森哥最好叫湯家驊、陳景生、馮紹波、彭玉榮、霍泰輝、梁承達、梁柏濤等等師兄報名，甚至乎到時（七點前）行上玉桃軒搵森哥，一於招待埋！」
講起森哥，電話就到，佢話在鏞記四樓與「史前中大人」吃午飯，要左丁山速速到，是日適逢無約，都算幾少有，於是一陣風衝上去。嘩，幾位「七十後」、「八十後」在座，分別係新亞嘅列航飛（1953）、李金鐘（1961）、崇基嘅熊翰章（1956）、李乃元（1957）、聯合嘅何萬森（1957）、高譚根（1962），年紀都在七十歲以上，左丁山變咗係小弟弟，森哥話在十二月四日下午二至四時於中大康本大樓舉行一場講座，各位老師兄細說「中文大學的前世及誕生」，佢自己會有內幕爆喎！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange