上周五葡萄牙對瑞典的世界盃歐洲區附加賽，被喻為是兩大球星基斯坦奴朗拿度（C朗）與伊巴謙莫域的正面對決。雖然葡軍最終「果然」由C朗一箭定江山，先勝一回合；但兩大球星此戰的表現，其實與在球會時仍有距離，伊巴更無中目標埋門，何解？
C朗今季在皇馬，暫已於17仗攻入24球；但在葡軍，9場世盃外圍賽連同附加賽「只」入5球。而以上仗為例，他觸球的次數及威脅性，皆不及在皇馬之時。其實在皇馬，箭頭人物無論是賓施馬或是已離隊的希古恩，把握力均遠勝其國家隊隊友普斯迪加，故此C朗在葡軍就算交出靚波，也未必有助攻；其次，C朗在皇馬時，身邊還有迪馬利亞、加里夫巴利等射得扭得之人，令對手疲於奔命，C朗自然更易「起Q」入波；第3，C朗勤力走位，於皇馬還有沙比阿朗素、莫迪歷等中場猛將「睇到又畀到」，入波自然水到渠成。相反在葡軍，可能C朗走到氣咳，摩天奴都未望到。而伊巴在瑞典，更加孤掌難鳴。
美斯常被批評在阿根廷表現失色，其實道理接近。在講求整體的巴塞，中場有沙維、恩尼斯達控球傳送皆強，美斯走啱靚位必有供應；而當美斯控球，身邊隊友例必不斷走位配合，美斯可今次交畀尼馬，下次交畀柏度洛迪古斯；當對手以為佢實交波，佢就突然變速突破，如此才可令人無所適從。
阿根廷雖然都有阿古路、希古恩等好波之人，但都是擅於獨自搵食，多過同人配合。現今足球，先進戰術訓練加嚴謹防守，指望一位球星獨挑大樑？out啦！現在的球星，其實都是靠整隊努力打造出來。
方柏翹
now足球評述員
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange