電視劇《天與地》播出兩年後的今日，Samantha認為The city is dead。當權者已完全當民意透明，任改遊戲規則，遊行不再有用，學埋強國法院咁，閂埋門即宣判香港電視（1137）「死刑」，而上市公司，港交所（388）大，證監大，都不及馬雲大，聲稱赴美上市「巴之閉」的阿里巴巴，改口話最愛仍是香港。
這邊口頭上友善，那邊持有阿里股份的博裕資本董事長馬雪征做證監非執董，大家都知阿里上唔到市源自證監，一旦過到證監，小加鋪定紅地氈邀阿里入門，所以馬氏辭任上市委員會真係多謝晒，若最終為娶阿里入門而修例，仲有啲咩值得我哋去珍惜？
港交所因阿里上市夢碎近月喪追quota，IPO空群而出，證券商胃口大，食散餐未必開心，諗嚟諗去財經公關最開心，若阿里上市只得幾間大魚大肉，𠵱家咁多間一齊上市人人有份，永不落空，本港唯一一家上市的財經公關皓天財經（1260）諗得過。
皓天去年純利升2.7%至1.24億元，2012年尾乃IPO冰河時期，皓天都唔使蝕錢，可見實力雄厚，加埋派息比率高達7厘。據官網資料先知佢哋今季有重慶銀行（1963）、雲遊（484）同輝山乳業（6863）等明星股做佢哋客仔，雖然呢批生意唔會反映於今日公佈的中期業績上，但該股橫行個多月終現突破，相信一年新高無難度！
Samantha
本欄逢周一、三、五刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange