小學雞年代，可有經歷過半夜三更，瞞住阿媽睇《聖鬥士星矢》？七十後大男孩總會試過！儲漫畫、Figure、絕版珍藏，這樣夠熱血嗎？對不起！請留意這位八十後美少女Vieko！她與朋友玩Cosplay玩到十二宮Full Team上陣，還誇張到拎埋聖衣，飛去希臘雅典親身朝聖，着迷程度，非你我可想！
記者：陳國輝
攝影：陳永威
五日遊聖域 親臨海皇神殿
玩Cosplay十一年的Vieko，在初中已愛上《侍道2》的奈美，之後仲玩埋Cosplay！但講到最激就要到2010年，皆因睇完《星矢》冥王篇後，深深被雙子座角色所吸引，由儲薩卡Figure、周邊產品，甚至製作黃金聖衣：「現時我已擁有幾套聖衣，包括星矢、紫龍和舜的青銅聖衣、雙子座黃金聖衣，連雅典娜、星矢的便服都有！」Vieko比較難忘，是近年與30位志同道合的Cosplayer組成Cosmic Legend，有時除咗會組成「黃金聖鬥士12人」，相約去戶外私影外，舊年還參加本地動漫節Cosplay比賽，獲得寶貴經驗之餘，還認識到不少好友。
《星矢》迷都好熱血，玩Cosplay唔出奇！但今年九月，Vieko做咗件連熱血粉絲都無諗過嘅事！就係帶同雙子座黃金聖衣，親身到希臘雅典朝聖：「好似教皇宮、雙魚宮，動漫入面都經常見到，但實景又係點？我真係好想見識吓！」
據Vieko描述，原來《星矢》主筆車田正美當時描繪的海皇神殿，的確有此古蹟：「我親眼見到的海皇神殿，原來已經爛剩幾條柱；然後才發現原著漫畫，居然是參照雅典科學園而成，真係估唔到！」故事中的教皇宮、雙魚宮，原來是仿照衞城博物館又或者其他神殿改建而成：「至於眾多景點中，我覺得最神似的，是星矢第一次取得天馬座青銅聖衣的巴特農神殿，如果要同原著漫畫比較，我會給80分。」雅典之行的代價雖然係$15,000旅費，但能親身接觸漫畫片段內的真實場景，單就這份體驗，已值得畢生回味。
足本收睇《亂噏24》x 楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24