商台陳志雲取代李慧玲做晨早時段節目，總算為特首去除一口眼中釘。晨早與黃昏時段做節目，聽眾或者認為冇乜大分別，但對政府來講分別就大。從設定議題角度而言，晨早節目至為關鍵，當日大班做10點前特首，同樣被董朝視為眼中釘，借續牌除之而後快，理由一樣。電台晨早節目其政治功能，在於影響咗全日其他媒體走向。
例如當政府表示行會關於發牌決定唔需要解釋立場一出街，第二日晨早電台已開始狂轟，議員在節目中表晒態反對，民意成形，到政府高層開完會商討形勢及對策，再到局長或放料權威人士出動spin media時，已陷入被動狀態。
時代已變 由網絡主導
對電台而言，首重影響力，其次才到rating。電台收聽調查方法比電視仲落後，李慧玲係當前商台眾多主持人中最有影響力一人，在商言商，求之不得，無特別理由下將最有影響力主持調走，極不尋常。電台要培育一個有影響力的主持人，係經年累月，五年、十年、廿年枕住做同一個節目積累番來，唔係靠創新創意，不停革新調動賺取支持。十年前清除大班前，商台CEO蔡東豪聘用李慧玲，佢用十年時間為商台取得影響力，而商台竟然要自斷一臂，可想而知，政府正準備故技重施，用番十年前招數，而出此下策者可能十年前、十年後係同一人。
但十年間世界早已大變，主流傳媒在政治動員吹雞能力已下降，fb取而代之，人人都擁有自己媒體平台，今次電視維權行動，12萬人湧上街頭，王維基本人相信都嚇一跳，根本唔係靠名嘴吹雞，亦冇街頭行動派政團出手。人人可以吹雞，李慧玲不過係最當眼的那一位。而設定傳媒議題，亦已變成real time。
一位議員發表低能白癡言論，cable一出，即share出去，順手改圖加負評，半個鐘已感染幾萬人，全部係活躍小圈子內意見領袖，跟住已影響即日主流媒體記者取態，因為佢哋都有自己news feed。如果網民瘋傳，報紙自然識做，做大單新聞，幾時輪到名嘴去set agenda。
十年前手法，今日經已冇用，當日封咗兩支咪，結果第二年七一仍有幾十萬人上街倒董，跟手，中央決定做大動作換特首。而家再郁李慧玲，又如何？不妨睇睇明年七一，自有分曉。
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange