官場奶媽林鄭月娥噚日又出動，今次唔使湊住啲局長咯，而係同親生大仔林節思（Jeremy）同場，出席自己任榮譽顧問嘅無止橋慈善基金步行籌款活動。八方本來好想睇吓，好打得嘅林鄭對住囝囝展示嘅柔情一面，點知原本俾大會安排親手遞嚿活動用嘅磚頭畀媽咪嘅Jeremy，竟然耍手擰頭say no，向阿媽送上一個大檸檬，結果兩母子全場零合照兼零交流。
提留守兒童倍感悲傷
本身喺英國讀數學嘅林公子，今年6月畢業返港，佢話未有打算做邊行，唔排除任職非政府組織，暫時唔考慮從政，母子平時好少談論政事。問佢支唔支持媽咪選特首，以及點睇阿媽咁打得？佢以噚日嘅場合唔適宜講私人嘢而唔回應。事實上佢全場同林鄭保持好遠距離，一張合照都唔肯影，唔知係咪唔想騎劫個活動？
Jeremy只肯講，佢先後隨無止橋去過甘肅、雲南同重慶山區做義工，幫助當地村民搭橋，最難忘當地人貧乏但唔會怨天尤人。村內有唔少長期同父母分離嘅留守兒童，令佢覺得特別悲傷；查實自小喺英國留學嘅佢，都同媽媽長期分隔兩地，唔知係咪因此特別感觸？
本身鍾意畫畫嘅佢，曾經為小朋友畫畫，仲獲小黃花做禮物。八方問收禮時有乜嘢感受，Jeremy突然拋書包用古詩19首其中一首回答：「此物何足貴，但感別經時」，意謂禮物雖簡單，但蘊含好深嘅情意。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange