八年前以歌手身份入行的王浩信，近年棄歌從視，發展更理想，繼去年在劇集被劉松仁怒摑13巴出位後，他近日又在新劇被謝雪心打足臉頰及身體共36下，因而獲封「兜巴信」！難得王浩信不介意受皮肉之痛，只要觀眾睇得過癮已值得，越鬧越開心。為演好《法》劇吸毒二世祖，他還向癮君子取經。
撰文：比華利
王浩信繼去年在無綫劇集《名媛望族》中被飾演嚴父的劉松仁怒摑13巴，日前在《法外風雲》中再被扮母親的謝雪心掌摑23巴及身上抽打13下，馬上被封「兜巴信」，莫非王浩信當真抵打？他日前接受本報專訪時笑騎騎說：「兩個角色都抵打，尤其《法》劇嘅宋家耀，阿媽好縱佢，佢唔生性去吸毒，阿媽心痛先摑佢。」
入戲患抑鬱
王浩信接二連三演二世祖，演得一次比一次到肉衰格，他坦言曾擔心被定型：「今次監製極力游說我，佢話個角色好立體，我睇過劇本都有發揮，劇情交代我自甘墮落，我第一次扮癮君子。」王浩信為演好毒癮發作這場戲，特別向一位已戒掉毒癮成為義工的朋友取經，他說：「我問咗朋友吊癮時係點，口水鼻涕係點流，了解晒成個過程，會幫我消化到角色，演時就容易投入。」王浩信被謝雪心兜巴星23巴，巴巴有力，他有苦自己知：「呢場戲拍咗三次，每take都有火，但心姐頭兩次打落去未夠狠，導演同我都唔收貨，因為打得唔夠大力，觀眾睇出嚟會好假，我索性叫心姐唔好錫住我。」
《法》劇拍了三個月，王浩信鏡頭前進入吸毒狀態後，鏡頭後卻抽不了身，他說：「試過凌晨收工，眼光光瞓唔着，成日維持住負面情緒，又出現呼吸困難同心跳情況，周身唔妥。」太太陳自瑤見狀就勸王浩信看醫生，他說：「一睇發現係輕度抑鬱，食咗一個月藥，配合做運動舒緩，慢慢就好番晒。」王浩信表示這次為角色犧牲大，當然也想得到回報，他說：「即使出街俾觀眾鬧，我只會越鬧越開心。」
講明恨攞獎
遭觀眾鬧爆之餘，王浩信期待憑《法》劇在無綫台慶頒獎禮奪獎平衡一下，他說：「我等咗四年，年年都話有信心，最終都落敗，今年平常心，但邊個唔想有個獎鼓勵吓，我話唔想攞，個遊戲都唔好玩啦。」
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！