每個星期五晚深夜離開電視台時，都會大夥兒坐同一架的士過海返歸，呢晚等極唔見熟識的司機馬sir，好在終於有空車，不過係一架消極的車。
「司機唔該紅隧過海吖。」「吓，星期五晚呢個時間塞到嘔喎，慘啦呢次。」
「有幾慘呀，使唔使蝕本呀？」我唔係玩佢，上周另一位消極的司機真係咁講。
「蝕硬啦……」司機繼續咿咿哦哦，但見佢冇進一步抗議，我哋都開始自說自話。
「其實我個人好怕醜㗎，讀書嗰陣連跑步比賽都唔敢玩！」LuLu無端端自我剖白。
「吓，睇唔出噃，你家陣咁大膽！」導演海倫話。
「我識個傳媒朋友，佢喺電視報新聞十幾年，但佢話原來次次都好緊張，根本唔鍾意出鏡。」我又搭嘴。
「超，我夠做咗的士司機廿幾年啦，我夠唔鍾意啦，咪又係要做，養妻活兒吖嘛！」肥仔司機突然加入戰團。
全車靜默，我諗緊點平息，佢又嚟過……「唔單止喎，返到屋企仲要洗碗、洗廁所，放假仲要洗抽油煙機喎，佢話呢啲男人嘢吖嘛，唔使你做呀？」
呢個時候，我用電話播出《獅子山下》呢首名曲，「啱唔啱聽呀司機大佬？」我問。
「𠵱家邊有人聽呢啲㗎，out啦，𠵱家聽韓國嗰啲吖嘛。」
我唔理，又播出另一首金曲，「命裏有時終須有，命裏無時莫強求……」司機大佬終於跟住唱，冇再發牢騷。
我都係鍾意馬sir多啲，每次一上車佢見有女仔就講鬼故，淨男仔就講鹹故，𠱁到成車開開心心。路程都係一樣，紅隧塞唔塞亦係見仁見智，乜嘢性格，決定咗你見到嘅係乜嘢風景。
KEYMAN
now TV主持
足本收睇《亂噏24》x 楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24