港足上周五喺亞洲盃E組外圍賽作客阿聯酋，賽前話加強中路防守，希望保持不失，可惜因為兩隊實力確有大段距離，結果又輸0:4，兩場夾埋吞阿聯酋8隻蛋；不過，「鐵血教練」金判坤賽後話，唔會就咁放棄爭出線！周二主場對烏茲別克場生死戰，我求大俠相信港隊必定Fight到底。
雖然知道作客阿聯酋凶多吉少，但我求大俠都有上網睇場波嘅直播，主隊贏咗就可提早出線，所以開波已經㩒住港隊嚟揪，港隊基本上連半場都過唔到，其中跟過曼城操練嘅阿聯酋進攻中場O阿都列文踢到識飛。
周二誓贏烏茲別克
港隊捱到27分鐘終於失守，而直播有影到教練金判坤失咗波之後嘅表情，直頭黑晒面。而完半場又走漏上場都有波入嘅阿巴斯，俾佢第一時間響禁區射地波入網，港隊半場落後兩粒。港隊響下半場一直捱打，就算門將葉鴻輝救咗唔少險球，點知頂到尾段都仲要失多兩球，結果又輸0:4，而贏波嘅阿聯酋就4戰全勝，提早出線2015年嘅澳洲決賽周。
由於同日烏茲別克作客3:0炒越南，已有7分喺手，排喺第2位，至於港隊輸波後只得4分，如果周二贏到世界排名55位嘅烏茲別克，就可以憑住較佳對賽過頭，淨番場作客對已經出局嘅越南，而烏茲別克就對阿聯酋，到時仲有數計。
金帥：Die for Hong Kong
當然，港隊排名148位，同烏茲排名差成93位，只係港隊近年對烏茲別克未輸過，而港隊主教練金判坤賽後講明，港隊唔會因為呢場慘敗而放棄爭取次名出線，而淨番兩場一定會全力保持爭次名出線嘅希望。我求大俠好記得，金帥早幾年講嗰句Die for Hong Kong，港隊戰將實會同烏軍死過。
港隊大軍噚晚起程回港，今朝6點到埗，黃昏就喺酒店集宿做最後準備，至於烏茲別克大軍噚日晏晝到埗，據聞佢哋即刻操練，但就玩閉門!
足本收睇《亂噏24》x 楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24