（哀）英格蘭喺上周五主場友賽智利擺到明試陣，由修咸頓嘅前鋒積洛迪古斯及翼鋒拉爾拉拿等擔正，結果就出事，英軍全場表現麻麻，以0:2不敵有阿歷斯山齊士（上圖中）梅開二度嘅智利，仲俾全場6萬幾名觀眾噓爆。值得一提嘅係，今役擔正做中場大腦嘅韋舒亞，表現認真麻麻，傳球成功率只得67%，喺全隊中排倒數第2，只比門將費沙科士打多；不過，韋舒亞賽後仲死撐話球隊可以從落敗之中吸取教訓喎！領隊鶴臣就坦白得多：「球迷今役狂噓我哋，但咁係可以理解嘅，有邊個想自己擁戴嘅球隊輸波呢？我哋𠵱家要做嘅，就係喺下一場對德國時表現進步。」另外，林柏特（圖左）帶同女兒喺賽前接受父親頒畀佢嘅英格蘭「百夫長喼帽」。
足本收睇《亂噏24》x 楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24