孫正繼續「上堂」
噚日F3排位賽，賽前講明嚟澳門學嘢嘅中國唯一車手孫正（圖）繼續「上堂」，排第28名，時間係2分18秒912，比起排頭位嘅意大利車手馬些路慢超過7秒，喺正賽有好成績，睇怕都唔容易，寄望佢可以完成到比賽啦！
漢堡包40蚊個「抵食」！
大看台附近嘅食肆唔多，所以如果要方便快捷，就要幫襯看台嘅小食檔。10蚊一罐汽水、漢堡包40蚊，仲有80蚊一個薄餅，價格合唔合理，就見仁見智啦！
學生免費入場睇排位
噚日有班學生着校服入場，原來賽會同澳門好多間學校合作，安排中、小學生免費入場睇排位賽，當係課外活動，班學生可以順便了解台前幕後點樣運作，又有得睇車，都話好爽！
車隊人員表演雜技？
車隊工作人員由朝忙到晚，少啲體力都唔掂！呢幾位仁兄就苦中作樂，靈機一觸，用單車送光頭車胎。睇真啲，中間位仁兄一手扶實個鐵架，另一隻手就捉實單車車尾（圖），難高咁高，如果佢唔做車隊，都可以去做雜技。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange