昨日，PS4正式於美國首賣！雖然香港行貨要12月17日先派貨，但小記聯同兩位打機狂迷，已搶先上香港SCE試玩；畫面、機能就唔再多講，今次親身體驗，例如打PS Camera以及第一身射擊遊戲，反應之快，準繩度之高，兩人讚不絕口，還說有人掣合一的快感！
記者：陳國輝
攝影：陳盛臣
模特兒：Becky@Portamento People
試PS Camera 1m都有反應
未諗到買淨機版抑或PS Camera套餐？可能你曾擔心，呢件新玩具會否像上代PS Move，只有簡單體感動作，拎住支棒Fing幾Fing咁兒戲！今次，模特兒Becky即場同大家試玩《The Playroom》，這是第一款同PS Camera連動的遊戲，雖指明與眼仔要有兩米距離，但現場肯定唔夠(大概一米左右)，抵讚是操作和感應均沒受到任何影響。
《The Playroom》包含幾款小遊戲，最熱鬧都算是AR機器人！起初玩落似Kinect，你可以手腳並用，撥開這些小機械人；但更過癮在於可以夾PS4手掣來玩，例如利用手掣Pad鍵把機器人逐一捽出來、或長按吸番入去，又或者你可遮掩手掣前面盞燈，令機器人感覺漆黑一片！最難得是全程沒發生感應唔到的問題，反應快而真實，適合一大班朋友齊齊玩！
射擊迷Kali 握手好 微調準
由六、七年前《Battlefield 2》一直玩到現在，Kali都算是一名經驗豐富的射擊迷；測試當日，試玩了第一身射擊遊戲《Killzone: Shadow Fall》，Kali透露曾玩過PSV版《Killzone》，特別有感情！
試玩一輪後，大讚畫面達到中上級電腦質素，儲存或跳至下一章節時，download遊戲速度還比上一代提升不少：「雖然玩電腦版畫面比較靚，但唔想花太多錢成日Upgrade硬件，今次PS4畫質細緻好多，玩Console就夠！」至於射擊迷最關心的操控，她亦有讚無彈：「手掣是重了一點，然而牛角手柄經重新設計，手感極佳，至於對焦用的兩粒蘑菇掣，微調亦比前作準繩得多。」她唯一擔心，是要慢慢適應Pad位，但既然可提升遊戲耐玩度，花多點時間適應又何妨。
伍公子玩《Knack》 物理效果正
伍公子既是機迷，又是製片人，同時亦為YouTube紅人，平時習慣聽他旁述教打機，點知今日竟然親身試玩動作遊戲《Knack》，過程中仍不忘其寸嘴本色：「這隻Game玩法太簡單，遊戲性質真係無乜好講！」不過，他說重點是主角具備的組合能力，可以散開一件件，然後又重新組合，畫面豐富逼真，正正體現PS4物理處理效果的強大機能。」
他還說，《Knack》尚未用盡PS4手掣特點：「跟PS3比，我認為最大分別是兩者手掣，它就像Move結合Controller的合成品，像剛才玩《The Playroom》，足以感受其處理AR的能力非常強！」伍公子自言首批推出的PS4遊戲中，無一款鍾意，他期待仍未公佈推出日期的《Metal Gear Solid 5》以及《Watch Dogs》兩款大作。
美版未到貨 淘寶千宗預訂
機迷最關心，莫過於美版PS4到港後會賣幾錢，數量有多少？可惜，香港水貨商在截稿前仍未返貨，而一早「報定價」的淘寶網，銷情卻相當熱烈；根據賣家資料顯示，定單數量已近一千宗，而且「參考價」也介乎2,900至3,300人民幣（約$3,683至$4,191港元），比早前估算的五千元炒價，回落超過一成！
足本收睇《亂噏24》x 楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24