年尾倒數，地產代理靠新盤撐場，生意總算稍有起色，當大行仍然奉行開源節流，置業18主席張肇栓「波叔」則睇準時機逆市發圍，揚言明年投資2,000萬元開多十間八間舖，請多百五人。「波叔」更大爆，其中一條財路來自內地豪客，上月更出現「爆數」，最近新盤抽籤「抽唔中」，反而令他們覺得非買不可，現正大搞內地富豪來港睇樓旅行團，食正新一輪推盤潮。
內地客非買不可
「上個月淨係一個THE AUSTIN，我哋3個內地客抽中3張飛，就賺咗好幾百萬佣金，公司即時爆晒數！」「波叔」坦言，新盤非常好搵，而新盤超額認購消息，更刺激起內地客人搶我搶心態，他們會為不中籤而不高興，反而變得非買不可。
他指出，自從政府實施買家印花稅（BSD）後，內地客並未絕跡，BSD對於富裕的內地客更不是大問題，而且會漸漸適應新稅制，加上人民幣升值，在香港買樓等如有78折。他分析說，今時今日內地客仍夢寐以求在香港買豪宅，但其實並不代表睇好香港樓價會升，他們不了解香港樓市，大多數人很愛炫富，純粹因為香港豪宅在國際上知名度高，在他們眼中北京、上海、廣州、深圳等大城市豪宅，矜貴程度始終不及香港豪宅。
籌辦湖南客半日睇樓團
置業18向來積極在內地尋找機會，打通當地脈絡，早於08年公司成立之初，即在溫州成立辦事處，是第一代北上引入內地客來港買樓的開荒牛，兩年前單是一個溫州團，就促成兩億元的買樓生意。「波叔」認為中國地大物博，二、三線城市隱藏很多客人，組團來港買樓，可以為公司帶來豐厚的利潤。
「波叔」稱，由於年底前將有不少新盤推售，最近到湖南洽談生意，早已有部署，準備與香港旅行社合作，籌辦湖南客來港4日3夜旅行團，其中有半日是睇樓，主要參觀各區新盤，了解香港地產市道，其餘時間遊覽香港景點。除湖南之外，在農曆新年後，將會接洽更多二、三線城市，包括清遠等地。
屋苑開舖 專攻細價樓
除組織內地團來港買樓，「波叔」另一財路是逆市擴充規模，專攻細價樓。他認為，無論市旺市靜細價樓都有人買。「呢兩年旺市行家搶舖搶人，但我無搶，因為根本唔夠行家搶，反而我留住實力，喺呢個時候大行裁員我就挖角，而且趁租金平可以擴充。好似𠵱家我哋做緊訪問嘅馬鞍山頌安商場分行，專做細價樓，前幾日剛裝修好，原本只係200幾呎細舖仔，我就睇中旁邊洗衣舖，於是等機會租埋隔離舖，將兩舖打通，擴充至500幾呎，希望可以做更多生意。」
置業18在馬鞍山區向來實力最強，目前有5間舖，但「波叔」認為不夠多，仍會積極搵舖。此外，沙田、大圍、西九龍、東九龍也是開舖選點。他指出，新盤陸續登場，亦會因應市場調整換舖，九龍站一帶屬兵家必爭之地，大部份業主具財力，向來都是新盤的目標客人，該區將會由兩間分行增至3間。
第4季樓市 細價樓升5%
目前是一手大旺，二手積弱，「波叔」指出，600萬元以下細價樓，仍然好受市場歡迎，放盤單位只要略為平少少，即有成交，而且細價樓向來好租，以沙田第一城為例，一個395呎單位，月租1萬元，收租回報不俗，業主寧願收租亦不會大平賣，樓價很難下跌。他估計，細價樓在第4季仍會有約5%升幅。至於1,500萬元以上的豪宅，由於市場已飽和，成交嚴重萎縮，樓價將下跌5%。
人棄我取
置業18現有20間分行，職員約230人。在「波叔」領軍下，置業18在逆市中，至今每月仍然有盈利，主要原因是沒有過度擴充。「一間分行最大成本是租金，租金太貴就只係白做，𠵱家行家已經唔搶舖，地產舖租金亦回落三成，可以趁平租番多啲靚舖。」「波叔」揀舖向來有一手，他謙虛地說︰「都係睇餸食飯，市旺忍手，忍到人哋唔要，就人棄我取。」
樓市貼士
「波叔」睇市準，他教路：「我始終擔心豪宅會跌得勁，如果揸住幾層豪宅（每間約1,500萬元以上），可以先趁高位賣掉一層套現，但市場成交少，想賣樓一定要比人平，今日睇係平咗賣出去，可能1年後睇番，原來都係一個好價錢。如果有多餘錢，可以買細價樓收租，回報穩定，唔憂租唔出，大眾化市場始終有量支持。細價樓仲有得升呀！」
足本收睇《亂噏24》x楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24