今年度金球獎，外界相信離唔開美斯、列貝利同基斯坦奴朗拿度（C朗）之爭。嚟到年尾，係候選人最後搏殺拉票嘅重要時刻，點知美斯受傷，要唞到下年先出得。睇見自己細佬形勢不妙，美斯阿哥都要出手，喺網上發佈美斯同獎盃嘅合照，希望盡全力拉票。
賠率僅第3熱
美斯阿哥，我求大俠見到嘞！美斯係有好多獎，啲獎係多過C朗，但你呢次拉票行動犯咗兩個錯。第一，金球獎係逐年計，唔係終身成就獎，晒埋啲陳年舊獎係冇用；美斯今年拎過啲咩獎？最威咪得西甲同歐洲金靴獎。第二，美斯今年嘅最大競爭對手係列貝利，而唔係C朗，你搵錯人比較嘞。
上半年，列貝利幫拜仁慕尼黑拎3冠王，喺歐聯仲請美斯隊巴塞隆拿「飲七喜」，威到震。至於美斯今年有啲跌watt，成日傷，喺新球季，佢嘅風頭就遠遠不及C朗勁；C朗年尾發力，𠵱家以16個入球排西甲射手榜首，同埋以8球排緊歐聯射手榜第一。英國博彩公司skyBET嘅賠率都反映到形勢，列貝利大熱，C朗就緊隨其後，而美斯就明顯被拋開。順帶一提，今日係美斯為巴塞一隊上陣十周年。
列貝利搵定位擺盃
大熱列貝利信心十足咁話：「今年前，我係好球員；今年，我係最好嘅。老婆已經執好地方，搵好位嚟放金球獎。我其實冇諗咁多，但老婆已經計劃好晒，同埋拜仁入面每個人都想我拎。」但列貝利就怨自己啲同鄉唔撐佢：「喺法國，我好似係金球獎嘅局外人。印象中，法國人更希望由美斯或C朗攞金球獎，我真係好想知點解。」另有消息話，C朗明知自己贏面唔高，兼且唔滿意國際足協主席白禮達之前話佢掛住gel頭，唔夠足球熱誠嘅言論，所以有機會缺席下年1月嘅頒獎禮。
而法比加斯就講笑話，唔會畀自己個女同美斯個仔拍拖：「堤亞高（美斯仔）都知，佢唔准同莉亞（法比女）一齊。」
足本收睇《亂噏24》x楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24