假如伊巴謙莫域同基斯坦奴朗拿度有一個冇得踢世盃，你會想睇邊個多啲？小弟知道C朗係當今球壇第二人，唯一可以同美斯並肩嘅球星；但我想睇伊巴多啲，因為佢已經32歲，如果呢屆冇份，咁以後都冇可能喺世盃再見到佢。
伊巴雖然俾人叫做球壇呂布，N姓家奴，但對於瑞典國家隊，佢真係一條心。儘管瑞典入去決賽周都係陪跑居多，但就係想睇吓，伊巴點樣用自己嘅天才，帶起隊波，咬緊牙關，全力向佢職業生涯最後一個大賽進發。
有伊巴就代表奇蹟有可能發生；小弟曾經無聊諗過，當𠵱家班球星退役後，邊個嘅精華片段會最好睇？美斯嘅相信係扭波嘅精華，C朗嘅雜錦片段就係遠射重炮嘅百科全書，比比嘅可能係武學全集，而艾舒利楊格就係演藝入門教材，但伊巴嘅就係一部神話故事。佢唔少入波都係匪夷所思，佢可以用身體任何部份同埋喺球場上任何地方都入到波。如果金球獎選舉係計邊個金球多嘅話，相信伊巴可以N連霸。
C朗，雖然小弟都好鍾意你，但我想見伊巴多啲，只好犧牲你。反正你後生啲，今屆踢唔到，仲有下屆，同埋葡萄牙近年越打越差，隊波冇晒隊型，進攻各自為戰，唔該作為隊長嘅C朗反省吓。呢隊葡軍入到決賽周都唔知分組賽出唔出到線，不如就畀個機會伊巴啦。文：咖喱
足本收睇《亂噏24》x 楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24