球星喜愛夜蒲司空見慣，奧斯爾（圖）今夏轉投阿仙奴，舊東家皇馬曾批評大眼仔熱愛夜生活，又掛住拍拖，所以一度被摩連奴打入冷宮。西媒周三又爆出德國球星夜蒲，本來屬等閒事，奈何偏偏正值喺阿仙奴激戰曼聯輸波後，「罪加一等」。
可能奧斯爾都心知不妙，一見記者就跑上車，仲即打電話向助手求救，身旁嘅男性友人更奮勇以身擋住球星，實在冇比「落荒而逃」更適合形容驚惶失措嘅大眼仔。見到張相都不禁同情有如被捉姦、藏身車廂嘅奧斯爾。你係球星又唔係偶像，你隔籬又冇拖住第二個非女友嘅物體，更加唔係食煙或學韋舒亞扮食煙，睇嚟傳媒真係將佢迫得太緊。
其實球壇大把壞孩子，比起列貝利嫖雛妓、五花八門嘅NBA球星性醜聞，奧斯爾只係儍豬在唔睇風頭火勢，輸波後夜蒲俾人捉到正。邊有鬼仔唔蒲，何況球星不嬲攞正牌㗎嘛，以為球星唔煙唔酒先最儍豬。文：呂晨
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange