體育比賽步向商業化，奧運、英超、NBA，都似牟利嘅商業節目多於運動項目，搵錢又點會少得世界盃。唔少已經打入決賽周嘅球隊，好似德國、日本等，已經推出世界盃期間嘅全新球衣，先搵一陣快錢先；記得之前「一剔牌」每逢呢個大賽，都有極具創意嘅宣傳廣告，好似N年前搵埋香港大導演吳宇森，拍攝森巴兵團出發前廣告，之後又搵埋亨利、中田英壽等搞個鐵籠足球；近年就將焦點投資去C朗身上。
小弟唔係C朗死忠，但如果世界盃冇C朗，就好似NBA明星賽冇勒邦占士，冇咗個話題王；係喎，下年世界盃由三色台直播，以往慣例，佢哋賽前必然安排一大班女星上所謂嘅專業節目；荷蘭叻必然又會扮晒專家，問吓女星鍾意邊個球員，女星又必然會照稿讀鍾意C朗呢個又好波又靚仔嘅球星。咁如果下年冇C朗，真係怕班女星會答番碧咸囉。
實不相瞞，小弟係法國粉絲，今時今日法國嘅處境都好似葡萄牙，仲未知下年有冇得踢世界盃；但人總係自私，自然希望下年世界盃法國嘅對手有咁弱得咁弱。由C朗領軍嘅葡萄牙，其實同英格蘭好似，一眾主力唔係踢英超，就踢西甲等聯賽，但打落去始終名大於實。葡萄牙都算係次圈常客，但始終去到8強4強就止步，係賭波角度，有C朗孭飛，葡萄牙賠率又熱又成日開對家，簡直係莊家恩物㖭。文：牽牛
足本收睇《亂噏24》x 楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24