聯儲局副主席耶倫噚日出席國會聽證會，就其獲提名接伯南克棒接受參議院銀行委員會提問，市場預期會順利過關，再交由國會通過，佢就會正式成為儲局第一位女話事人。
市場較關注嘅係，反而係佢坐正後，係咪真係會延續伯南克「戒急用忍」嘅退市路線，結果佢亦不負眾望，喺預先發佈嘅證詞裡面，指美國經濟比08年金融海嘯後強好多，但係如果同潛在水平比，亦相差一大截，加上失業率過高同通脹低迷狀況未變，儲局未來仍要做好多功夫去撐經濟，直到昔日雄風再現為止，言下之意即係儲局唔心急退市。而喺佢嘅維穩言論之下，市場又有條件反射，亞洲股市噚日全線高收，歐洲股市表現亦都唔錯。
之不過，如果大家唔善忘，都應該記得伯南克提出嘅退市路線圖，傾向年底開始退市，明年中停晒所有買債行動。加上近排美國經濟數據對辨，大摩就估計，儲局退市應該係呢幾個月內發生。
雖然市場情緒過去半年跟隨退市消息擺動，但無論係歐股或美股，呢半年都錄得升幅，某程度反映市場對退市早有心理準備所以對退市消息越來越麻木。
以近期為例，美國上個禮拜啲經濟數據超理想，第三季GDP增長達2.8%，10月新增職位更多於20萬份，遠超市場估計，市場又翻炒儲局下月縮減買債規模，美債自然首當其衝，10年期債息曾高見2.77厘，比上月底抽高約20點子。
不過消息對股市同匯市就冇乜影響，道指禮拜三又創收市新高，已經係今年第N次；美元就呆呆滯滯，除咗兌日圓走勢偏強之外，兌其他主要貨幣都係窄幅上落。
歐洲噚日公佈第三季GDP僅增長0.1%，比第二季嘅0.3%遜色，其中法國更出乎意料錄得負增長，加上歐元區失業率處於12.2%新高，情況的確令人憂慮，難怪歐洲央行上個禮拜要突然減息撐經濟。
歐元中線仍要跌
雖然歐洲經濟前景堪憂，但歐元上個禮拜跌落1.3295美元後，呢個禮拜喺1.33至1.35邊緣上落，較合理嘅解釋係，市場覺得歐央行利率得番0.25厘，再減息嘅機會唔高，淡友暫時按兵不動，但由於歐洲經濟前景欠佳，中線應仍要跌。
另邊廂，日本上季經濟增長縮至1.9%，雖然比市場預期嘅1.7%理想，但增幅只及上季嘅一半，市場開始揣測日本央行可能要加碼放水撐經濟，加上美日國債孳息差距拉闊，美元兌日圓噚日升返上100，係兩個月以為來首次。
有分析員估計，日本經濟引擎熄火，加上儲局遲早退市，日圓短期會成為狙擊嘅目標，美元若能企穩100日圓，有望挑戰今年高位嘅103。
奇兵
本欄逢周五刊登
足本收睇《亂噏24》x 楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24