土豪最近成為內地潮語，iPhone 5s被一致睇淡，結果因一隻「土豪金」顏色而彈出，廣州恒大足球隊花6億幾一年，被稱為土豪，但成功奪得亞冠杯，粉絲大嗌我愛土豪。
本來土豪二字有貶意，共產黨靠打土豪分田地起家，土豪二字借用到網絡世界，泛指打online game亂花錢買武器、裝備之有錢盲毛。𠵱家土豪style已變成正面肯定，一種內地炫富浮誇嘅設計、美學及行事作風。正如美國hip hop界黑人rapper戴粗金鏈、金牙，閃令令bling bling風格，左擁右抱，成為一種獨特美式土豪風格。
浮誇炫富笑死人
土豪帶有戲謔成份，將一種有「娘」味嘅打扮、盲毛炫富行為自嘲，但客觀上全世界奢侈品消費將會受呢種土豪風所影響，廣東道名牌百貨店窗櫥設計亦要貼近土豪品味，土豪金會成為聖誕新年主色，名牌設計個logo越來越當眼越大個，以切合土豪炫富style。香港要食自由行呢條水，無可避免要倒退回八、九十年代，以浮誇炫富來吸引內地土豪。在政治上，土豪作風也越來越強勁，「賤骨頭論」係表表者，充滿左風文革式戰鬥語言，Tree Gun立法會豪言壯語，叫王維基收皮，都係土豪化象徵。
講到本地土豪icon，又點少得陳百祥，盲毛炫富愛認叻，典型八十年代人辦，最近又有豪言壯語，寸網民杯葛台慶冇作用，寸嘴乞人憎，幫TVB倒米，因為𠵱家正醞釀杯葛埋台慶廣告商。TVB𠵱家重用福祿壽三位過氣藝人，即陳百祥、曾志偉、譚詠麟，可見其主事人真係out得好緊要。呢種八十年代窒人唔使本，駁嘴駁舌，浮誇炫富style對年輕一代唔止out，仲係乞人憎。全世界在金融海嘯後貧富對立嚴重，1比99現象受到全球社運年輕人口誅筆伐。呢班人一如成龍，早已變成笑話，但當然以內地口味掛帥，土豪icon仍然大有巿場。其實，TVB根本已經唔係畀香港人睇，因珠三角土豪眾多，廣告商也buy，所以陳百祥先至可以咁寸。
香港人，連一個真正屬於自己嘅電視台都冇，真可悲。
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange