近日望住個報價機，兩個字──「眼寃」！無消息下挾上的股多，但舞高弄低的「假動作」仲多，發愁中見到眾彩（8156）子公司同中興九歌合作發展無紙化自助彩票銷售系統的新聞，Samantha最鍾意炒電子股，但望住一隻創業板股一個月由3毫子炒上1.7蚊的氣勢，唔敢追，勇士們可吼已轉主板的華彩控股（1371）。
華彩是中國公益彩票行業系統、終端設備、遊戲產品的技術提供商與運營服務商，公司講到明新媒體彩票係未來發展重點，幾年前已與博彩技術領導者IGT、全球最大電腦彩票運營商GTECH組成戰略聯盟，可見其決心，據官網資料，華彩手機彩票軟件可適用Android和iOS平台，又與銀行、三大電訊商合作，絕對有力搶佔市場。
隨着互聯網銷售彩票開放，華彩加多份憧憬，首席財務官陳丹娜曾指新媒體業務佔總收入不足10%，期望三至五年達至30%。上半年電話售彩增長2.5倍，與招行（3968）合作的手機彩票客戶端新版已上線，與上海浦東發展銀行合作的手機彩票客戶端8月亦投入營運，中期純利4,060萬銀，相當去年全年60%，加埋集團連續三年有盈利，該股下周二公佈轉主板後首份季績，應唔會咁快走樣。
Samantha
本欄逢周一、三、五刊出
足本收睇《亂噏24》x 楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24