星期三有兩場跨洲嘅世盃附加賽，南美洲嘅烏拉圭作客大炒約旦5:0，而中北美洲嘅墨西哥就主場大勝新西蘭5:1。踢完首回合，烏拉圭同墨西哥大半隻腳入咗決賽周，真係買定機票去巴西都得！
卡雲尼入衝力罰球
烏拉圭世界排名第6，約旦排70，雖然實力差咁遠，但烏拉圭都冇輕敵，擺齊卡雲尼同蘇亞雷斯，強攻約旦。靠彭利拿、史杜安尼、盧迪路、基斯甸洛迪古斯同卡雲尼各入一球，烏拉圭以5球大勝，其中卡雲尼喺補時嘅罰球入波最靚，十足衝力射球，有勁度有角度，死角入網，約旦門將得個睇字。
烏拉圭教練泰巴利斯承認，亞洲足球嘅實力差過南美好多，「相比我哋喺南美嘅對手，約旦嘅實力真係唔同層次，呢個係事實。雖然佢哋主場喺亞洲好勁，但我哋今場去克制佢哋，做得好好，因為我哋個人實力始終喺約旦之上。」隊長盧根奴同卡雲尼講嘢就客氣啲，話賽果唔反映戰況，話約旦嘅壓迫做得幾好。
下星期三，兩隊會去烏拉圭主場踢次回合；相信烏拉圭hea住踢都可以晉級，但泰巴利斯就話唔會留手，要對得住入場球迷，「首回合賽果令我哋佔盡優勢，但喺次回合，我哋會繼續進攻，將好波送俾坐爆球場嘅烏拉圭球迷。」
老墨5:1炒新西蘭
另一場附加賽，墨西哥冇召查維亞靴南迪斯等外流兵，主場照炒新西蘭5:1，相信出線都高唱入雲。教練米基爾靴里拉話，呢場大勝好重要，但會喺下周三嘅次回合繼續搵入波，當首回合係0:0咁踢。佢仲話自己只係替工，幫手帶埋呢兩場附加賽，之後墨西哥足總先會決定新帥人選。
足本收睇《亂噏24》x 楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24