百貨公司銀泰（1833）喺今年光棍節，首次參與阿里巴巴天貓網嘅促銷活動，翌日就宣佈當日生意升咗6倍，但股價毫無反應。咁反映咗啲乜？當大家冷靜下來，就會發現風光銷售數字嘅背後，其實並唔係好似馬雲所講嘅咁美好。
光棍節促銷，係一個marketing campaign，用極低折扣去透支消費力，零售商生意多N倍都好，其實賺唔到乜嘢錢。呢件事最着數嘅當然係阿里巴巴，佢不但收咗交易佣金同廣告費，仲搶晒全世界注意力，吸引平日唔網購嘅人都因為減價而去試吓，長遠希望令網購更普及。但對參與嘅商戶嚟講，個故仔就唔同講法。有喺天貓開店嘅零售商就話，光棍節令佢哋嘅毛利被硬掘咗幾成，埋單計數其實無乜錢賺，只係當做宣傳。如果你唔參加，就會失去喺天貓嘅市佔率，其實係焗做。
儘管阿里如今如日方中，但其實佢都開始面臨唔少挑戰。其一係手機上網，越來越多人習慣用手機或者平板電腦喺網上支付交易，令到擁有2億活躍微信用戶嘅騰訊（700），較阿里更具優勢。另一隱憂係內地物流建設嘅投資，長年以來持續過少，未來邊個掌握到呢一瓣，話語權勢必大增。網絡潮流要逆轉可以好快，大家都要鬥快砌好個ecosystem，跑慢少少都可能會萬劫不復。
唔怪之得，阿里旗下嘅「菜鳥」唔會上市啦……
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange