講開國泰航空（293），太古A（019）兼國泰前主席唐寶麟（David Turnbull）又有新動向，佢唔係轉工，而係去幫吳光正旗下九龍倉（004）擔任獨立非執董。花名叫牛哥嘅Turnbull𠵱家唔喺香港，佢話九倉係好公司，業務有趣，於是答應做獨董，畀吓意見。
58歲嘅牛哥大學畢業加入太古，一做幾十年，最為人津津樂道，應該係佢2005年升任太古、國泰主席，當人人以為佢滿足於呢個事業高峯，佢做咗一年左右就辭職拜拜，原因係佢比較鍾意落手落腳工作。
之後佢走去太平洋航運（2343）做獨董，做咗幾年變為執行主席，𠵱家亦做緊金沙中國（1928）獨董。牛哥加入之後，九倉董事局更加人強馬壯，有8位獨董，包括錢果豐、詹康信，執董亦有7位。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange