用一日地獄一日天堂嚟形容港股，相信冇人會反對，前日大陰燭跌穿22600點主要支持區，噚日三扒兩撥又衝番上嚟。可以肯定嘅係，𠵱家絕對唔適宜炒指數股，因為隨時俾人左一巴右一巴咁摑。唐牛現時主要吼實兩類股份，一是有業績支持股份，例如彩星玩具（869）同TCL通訊（2618），噚日齊齊破頂。另一類就係有概念兼估值夠平嘅股份，環保股中滔（1363）就係當中嘅表表者。
本欄曾於10月下旬推介中滔，當時股價處於1.76元，11月初最高見2.45元，半個月爆升四成，超標完成，其後由高位回落15%，兩連陰後噚日再見陽燭，或為完成調整訊號。
中滔環保專門從事工業污水處理，於廣東及湖南省共營運五個污水處理廠、一個工業供水廠及一個污泥處理廠。
國務院早前頒佈《城鎮排水與污水處理條例》，將於明年起實施，大力鼓勵民間資本參與投資相關設施，中滔可謂食正條水，一旦獲得補貼，有力做大做強。雖然經過一輪急升，中滔現價年度化市盈率僅17倍，較同業光大國際（257）及北控水務（371）平均預測市盈率25倍，依然折讓逾三成，用20倍市盈率作目標，可見2.65元，潛在升幅18%，屆時仍較同業折讓兩成。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange