都話時間可以沖淡一切，免費電視牌照風波，全港震怒又如何？政府一於當見唔到，一味用「拖字訣」，繁忙嘅市民又慣性淡忘。
可憐嘅香港電視網絡（1137）公佈全年業績，由盈轉虧，主席王維基再一次話，如果未來三至六個月免費電視牌都無新進展，就會有其他新計劃。死得不明不白，拍咗咁多劇集又出唔到街，業績又見紅，股價想升都幾難，噚日港股大反彈之時，港視就逆市下跌4%。
除咗免費電視牌之外，關乎全港市民嘅重拍3G頻譜，廣大市民又記得嗎？通訊局原定上月底公佈決定，但又拖到今個月上旬。市傳今個星期就有結果，估計政府都係一意孤行決定重拍。
政府「無端端」要重拍3G頻譜，幾間電訊商唔單止要拎番三分之一頻譜出嚟重拍，仲要準備拎筆錢競投，加上競爭對手多咗，生意自然難做。
摩通建議換馬電盈
今年數碼通（315）、和電（215）股價已跌到夠晒殘，呢幾日明顯再跌得甘啲，股民已打定輸數走人。
事實上，成班電訊商中，數碼通幾乎所有生意都來自無線電話業務，戰鬥力真係幾弱。摩通表示，電訊商下半年挑戰更大，唔單止智能電話增長動力減弱，加價因素又未反映，連同頻譜打擊，和電及數碼通未來幾個月股價將會更弱，建議換馬去電盈（008）作為期六個月的投資，但若果想作長線，仍然偏好和電，目標價3.8元。
瑪姬兒
足本收睇《亂噏24》x 楊千嬅；影帝張家輝接力上陣！
周一至周五《亂噏24》約定你： http://bit.ly/appletalk24