在馬場偶遇高人，佢略講一兩點，話明年馬年甲午年嘅立春日（二月四日）八字唔多好，香港似有大嘈吵，情況比今年還要亂，叫左丁山坐定定。佢仲講：「依家聽講又試扯起移民風，移民到台灣㖭，係唔係㗎？」高人平時少理世事，不知市面情況如何，佢問左丁山算係問道於半盲，自己對移民風氣一事亦唔清楚，不過前星期有上世紀九十年代嘅畢業生A搵過左丁山吃飯，就係徵詢意見，好唔好帶埋仔女移民，如果走，去邊度好。既然新一代人物有此一問，顯然並非偶然，或者雖然未成為風氣似1989後，但自梁振英上台至今，壯年人（三十幾至四十幾）嘅人心動搖，確有跡象。
講起移民，左丁山絕無經驗，從未想過，搞過。觀乎自己同輩之移民經驗，代價好大，不少人犧牲咗香港事業，讓出空位俾後來者上位成名，自己就在美加澳紐平平無奇，更有甚之者，就係犧牲婚姻，家庭破碎。換來甚麼成果？就是給下一代子女多一個國籍選項，領得美加澳紐護照，然後不少下一代返回香港搵工。
畢業生A亦是如此諗，佢話為咗幾歲嘅仔女着想，要為佢地增加一個護照選項，到大個咗可以隨時離開香港「避秦」，至於呢個option（選項）仔女是否行使，做父母唔理得咁多咯。呢番說話似曾相識，1989後就有不少同學朋友講過，評論過，想不到將近25年後，重新打入香港中青一代心窩。（按：林奮強計算過，1981-1998年間，有68萬人離開香港。）
左丁山係自由派，從不阻止別人如何如何，例如明知吸煙有害而仍然吸煙，係成年人嘅自由選擇，左丁山唔會批評人地吸煙。移民一事，最緊要想清楚代價成本（職業、事業、家庭婚姻及文化生活皆有成本）以及回報（外國護照，外國長期生活及在外發展事業），才好做決定。香港本來都唔錯吖，點知出咗一位梁特首，佢居然有本事刺激到壯年中產去搞移民，真係服咗佢。與財務M講起，佢輕描淡寫咁話：「我一家六口，包括新抱女婿，都有澳洲護照，唔關我事！」佢就係在1990年初移民，1994年回流，趕及樓市股市大升前買到靚樓嘅一批人，算係夠運一代。