辦公室入面，最易聽到是非嘅地方，非廁所莫屬，特別係女廁。同樣，想知後市走勢，女廁亦都係一個好地方。近期大家都問，科網股玩完未，以下呢個故事，或者畀到大家啟示。
強勢轉投《蘋果》嘅《爽報》YY昨日同菲菲講，聽到清潔姨姨喺方便期間接咗個電話，然後姨姨問對方：「喂！我啲騰訊（700）點呀？」話晒一手騰訊都要近四萬蚊，呢位姨姨能夠問得出呢個問題，證明有番咁上下財力。
呢年事令菲菲諗起6月時，又係去廁所同個清潔姨姨吹開水，佢話近期跌到驚，所以沽晒手上嘅工行（1398）同建行（939），結果個市反覆上番二萬三。大家都知「全民皆股」，對大市來講，永遠唔係好兆頭，散戶方向通常要掉轉行先啱。
𠵱家連清潔姨姨都已經衝咗去捧騰訊，呢個係凶兆之一；其二係科網、手遊新股相繼上市，鬥地主博雅（434）更加成為凍資王，可惜雷聲大，雨點小，上市兩日只較招股價高4%；至於雲遊（484）更加創上市新低；其三，騰訊業績差過預期，其他科網股想跟炒？難矣。
更重要係，「港股死光」光銀H股傳最快12月來港上市，大市向下機會極高，科網股跟手炒完都不足為奇。
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange