三中全會無料到，大戶散戶先沽為敬，港股埋單跌437點，失守22500點，相信最開心嘅，應該係日前事先張揚已沽空期指嘅劉央。
大市雖跌穿重要支持位，但本欄近期部份推介如花樣年（1777）、包浩斯（483）都有不俗表現，在此先update一下最新動態。花樣年繼續日日回購，而且有越買越高之勢，有貨嘅戰友不妨坐定定放紙鳶。成功突破橫行區嘅包活斯發盈喜，預期截至9月底止盈利將顯著增加，保守估計增長一倍，下半年盈利按年升兩成，則全年賺1.3億銀，以昨日市值11億銀計，市盈率9倍唔夠，解釋為何股價噚日可以逆市升近2%。
今日推介一隻較冷門嘅半新股智美集團（1661），主要喺內地製作及發行電視節目、籌辦體育賽事，以及提供傳媒投資管理服務，分別由智美節目、智美體育及智美品牌營運。剛閉幕嘅三中全會提出要深化文化體制改革，智美經營嘅綜合文化產業，絕對食正條水。智美早前宣佈，套得國際龍舟聯合會世界盃、中華龍舟大賽及央視五個電視欄目獨家承包經營權，前兩者更屬內地頂級賽事，意味智美業績隨時幾何級數增長。雖然現價年度化市盈率達20倍，但以其獨特業務，加上冇蟹貨阻頭阻勢，相信可以繼做跌市奇葩。
唐牛
足本收睇《亂噏24》x楊千嬅；緊接落嚟 Miriam繼續同你談談情,吹吹水！
周一至周五《亂噏24》約定你： http://bit.ly/appletalk24