周日英超大戰，曼聯憑前鋒尹佩斯倒戈取得唯一入球，主場1:0擊敗阿仙奴；入波唔緊要，尹佩斯卻食言，之前講過對阿仙奴入波唔會慶祝，但今次入球後就同隊友攬埋一堆，事後就俾網民聲討。講倒戈，NBA來來去去30隊，除非你出走海外，如果唔係都幾難避免轉會，好似鄧肯、拜恩、奴域斯基等一生只打一隊嘅球星，𠵱家已經鳳毛麟角。
NBA球圈好細，如果好嚟好去，倒戈都唔係有大問題，而且好似湖人同快艇，紐約人同網隊，呢啲有世仇球隊都有球員交易。勒邦占士（LBJ）2010年做完「The Decision」後，就由騎士轉到熱火，一度成為全克里夫蘭市公敵，不過隨住LBJ公關幫佢搞番好啲形象，甚至LBJ自己講，希望總有一天返克里夫蘭打波，上季作客騎士竟然有番歡呼聲。
NBA倒戈出現感人場面，反而時有所聞，好似AI艾華遜之前由76人轉投金塊，當佢返費城比賽時，就去場中心錫地板；亦有加尼特由木狼轉投塞爾特人，如願拎到總冠軍，當佢返到明尼蘇達都流晒眼淚。講真，你當佢哋真心又好，手段又好，始終提升個人形象好重要，所以我奇怪尹佩斯點解連場咁簡單嘅戲都唔做？
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24