湖人周二主場迎戰塘鵝，以116:95大炒客隊，為上周五作客新奧爾良被炒11分場波，報番一箭之仇。今仗攻入17分嘅主隊射手尼克楊格，日前同新歡去嘉年華被影到，諗住玩射籃遊戲送毛公仔畀女友，但係瘀爆大針收場！
湖人繼續有拜恩養傷缺陣，仲有尼殊因背部同大腿傷而要唞兩周，球隊星味盡失，要加素一個人頂硬上。不過，一班小將今戰打得極之落力，計埋尼克楊格，主隊全隊有5名球員得分達雙位數，當中後備沙維亞亨利第3節末段單手大力入樽，撞到客隊新秀中鋒謝夫韋菲成個人撻咗落地，成為全場最精采一刻；最後湖人以21分怒炒客隊，終止兩連敗頹勢。
賽後，有15分進賬嘅沙維亞亨利，講笑話大學隊友謝夫韋菲唔會介意俾佢「in your face」：「佢係我老友，應該唔會介意嘅，但佢唔應該喺我入樽嗰時出現囉。」
另外，美國爆料網《TMZ》發現尼克楊格日前同喺twitter撻着嘅澳洲rapper艾莎莉亞（Iggy Azalea），拍住拖去洛杉磯嘉年華。尼克楊格之後受記者挑機，玩射籃遊戲點知大針，送唔到毛公仔畀女友，惟有面懵懵咁急腳離開。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange