報告王:提防統一反彈再尋底 - 瑪姬兒

報告王:提防統一反彈再尋底 - 瑪姬兒

三中全會眨下眼就過咗,港股噚日都眨一眨眼就唔見咗400幾點,仲以全日最低位收市,個勢真係弱到震,跌穿多個支持位。不過,統一(220)就好叻仔,竟然逆市升近3%,收7.86元,一連升越10日及50日線,仲要有大成交配合,技術走勢方面,STC、RSI都出現轉勢迹象。

高盛狠削盈利預測

不過,細心睇清楚統一份季度業績,就知道統一其實仲係身陷困境,絕非想像中佳。高盛發表報告中指出,統一首三季盈利增加近兩成至9.56億元人民幣,是全靠賣咗旺旺(151)套現等,錄得4.5億元人民幣出售收益所推動。
統一單計第三季度,更多賺29%至3.81億元。撇除一次性特殊項目,實際上核心盈利是倒跌70%至8,900萬元人民幣。公司更承認,市場競爭太過激烈,飲料及公仔麵市佔率都慢慢下跌。
事實上,過去一段時間,統一同康師傅(322)鬥到難分難解,兩大龍頭燒銀紙,打減價戰。市場揣測統一可能唔太夠銀彈,所以要賣旺旺套現應戰。
雖然統一已經喺部份省分停止「方便麵贈送香腸」的優惠戰,意味着統一可能要舉白旗停戰。不過,兩大龍頭激鬥一輪,點都要時間復原。
高盛仲講到明,統一將來唔會再係康師傅對手,故狠削今年盈利預測47%,目標降至7.3元。
呢排個市咁弱,小心統一彈一彈之後就又再尋底。

瑪姬兒

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange