卓能集團（131）主席趙世曾除咗出名多女友之外，亦以敢言見稱。佢早排已經話要減少在港投資，噚日出席股東會後更加肆無忌憚鬧爆政府，指香港嘅營商環境轉差，CY政府效率低，「我喺香港做咗50幾年（生意），𠵱家喺香港投資無乜意思！」
「（𠵱家做生意）要睇政府面色，話唔畀你賺，就唔畀你賺，個市場係人為出來。」佢批評政府過份干預市場，直指CY政府「唔係做得好好，又冇人肯負責」，政治爭拗仲越來越多，加上社會充滿仇富心理，令營商環境越來越差。
眼見本港地產商近年陸續北上發展，佢認為，咁樣即係反映大家對香港投資都有保留，佢亦都選擇減少在港投資。講係咁講，佢仍然睇好本港樓市前景，認為低息環境持續，加上近期新推樓盤吸引買家湧現，估計一手樓價已經見底，未來平穩發展。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange