三中全會閉幕，新設國家安全委員會及中央深化改革領導小組，客觀上呢兩個新設組織，可以擺脫共產黨自鄧小平之後，所採取黨內派系集體領導框框，毋須再受制於人盯人式派系政治，外邊評論認為係習近平集權重要一步。
中國利益集團死結難解
究竟強人模式係咪可以成功？唔可以照搬俄羅斯普京嗰套。普京式強人崛起，其客觀背景係經歷葉利欽急進市場改革，快速私有化國家資源流入「自己友」寡頭集團手中，以別列佐夫斯基為首的七大寡頭，控制國家金融、石油、電力、傳媒，葉利欽與寡頭合作，換取政治上支持，但民眾對此甚為不滿，國家及政府實力大受削弱，普京出現，係民眾不滿寡頭既得利益集團，而普京打住對付寡頭利益集團而取得民眾支持。果然佢上任後立即重手對付寡頭，流亡嘅流亡，坐監嘅坐監。
內地情況與當日俄羅斯相比，同樣經過35年改革開放，行業寡頭集團形成，金融海嘯後更出現國進民退，民營企業鬥不過有官方背景之國企。但中國情況未及俄國境地，在俄羅斯寡頭集團甚至成為政治上King Maker，中國利益集團以官僚部門及企業利益勾結為主，要整治起來，比起普京鐵腕打擊寡頭更困難，因為普京只須重點打擊個人便收到成效，但中國式利益集團係一個系統、體制，要改革談何容易。
第二個條件差異係蘇共失去政權後，俄羅斯牌面一套政治體制失效，強人才有發揮機會。但中國共產黨仍是執政黨，黨內派系對形成強人有掣肘，即使鄧小平年代，也無法全面壓制黨內保守派，因為佢哋可以依靠黨系統保護生存。胡溫十年，一開始又係雷聲大，但一任五年之後，已經被利益集團圍困，最終只有落雨收柴，溫家寶退下前就齋噏政治改革，實踐就無能為力。
對於習上場後向左轉及收緊言論控制，有人為習解說，認為經濟放寬政治收緊是為咗爭取保守勢力支持經改，對此我一直有懷疑，原因不在於大家信唔信佢，呢種唯心論分析人言人殊，歷史唯物論要講物質基礎，今日利益集團與鄧時代相比，其權力利益糾結複雜得多，已非鳥籠經濟陳雲，左王胡喬木、鄧力群幾個人問題，而係一大棚既得利益集團，有企業、有官僚、有黨人脈，也有輿論力量。做普京式強人，好難！
添馬男
足本收睇《亂噏24》x楊千嬅；緊接落嚟 Miriam繼續同你談談情,吹吹水！
周一至周五《亂噏24》約定你： http://bit.ly/appletalk24