已經40歲嘅孫耀威近年轉戰台灣,早前因為喺台灣做嘢唔見咗銀包,24小時內就搵得番,即刻讚當地人有人情味,最後仲計劃留喺台灣長住,斥資1,500萬新台幣開夜店落地生根,其實近排香港人都因為同內地人湧嚟香港引發唔少衝突,好多人都話要移民台灣,估唔到老孫咁快實踐。
自誇性能勁
93年喺台灣曾經紅過嘅老孫,喺台灣拍戲冇耐就扑槌留低長住,仲同兩個股東合資搞食肆,佢話自小鍾意食海鮮,日前佢喺新夜店狂試北海道進口生蠔,仲講笑話可以一次過食40隻,自誇性能唔錯㖭,但佢同女友陳美詩(Macy)都係虔誠基督徒,咁有冇守教條冇婚前性行為先,老孫就同台灣傳媒話:「已經戴着守貞戒不開機4年,開始比較辛苦,久了就還好。如果結婚了,就會覺得結婚『好爽』!」其實佢同Macy已經計劃結婚,但唔會刻意公開,有咗就一定公佈,老孫話:「我不希望小孩以後偷偷摸摸,有小孩一定會抱出來開記者會。」
撰文:馮仁昭
逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com睇番足本網上版,除咗有專訪外,仲有好多時裝靚嘢睇!