英國收費電視業新丁BT Sport剛宣佈以近9億英鎊奪得3季歐聯及歐霸的英國轉播權，這對傳媒大亨梅鐸旗下的體育電視業務大佬「Sky」，無疑是一大衝擊，頗有當年王維基顛覆電訊市場意味。如此看來，英政府就遠不及香港政府窩心了：港府會擔心電視市場承受唔住，擔心廣告商賣唔晒啲廣告，為免市場受衝擊而發牌3揀2；若以此思維，英政府為免帶來衝擊，應阻止BT Sport高價奪播映權，好讓市場維持現狀、Sky繼續做大佬；可惜他們不夠細心，不懂擔心市場受衝擊，只擔心市場唔夠自由。
近日有位「洋名」「Tree Gun」的議員，知悉港台新大樓造價達60億後大發偉論：「原來新電視台淨係Infrastructure都要60億㗎，王維基嗰幾十億身家，真係收皮喇！」Tree Gun議員，好料周圍都有呀！好似BT Sport，原來買一季英超轉播權都要幾十億港紙！王維基無能力買番兩三季英超免費播畀香港市民睇，抵佢收皮啦！係咪？雖然Tree Gun議員可能只係玩幽默，想諷刺港台大樓超支誇張，但比喻真係咪亂用，否則以其邏輯，有人會話：香港有人住緊層樓值兩億，若Tree Gun議員家住大樓只值幾百萬，係咪都應該收皮？
英國由1960年黑池對保頓的首場足球聯賽直播，至現在新競爭者不斷出現，市場蓬勃發展；至於香港，有這樣窩心的政府，還有大量「Tree Gun」的議員，莫說發展，可能正如議員所說：真係收皮喇！文：方柏翹
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24