【本報訊】蘋果iPad mini Retina版本昨黃昏前突然開售，並無出現預期的搶貨潮，4G版本一個多小時後賣清，但WiFi版至晚上10時仍然齊貨未截單。對於「後市」，旺角先達收機店意見紛紜，有指新機比月初發售的iPad Air更具「鑊氣」，水位有500元；也有人睇淡炒風，今日即使有貨到亦只會低於正價收機，「果農」要三思。
記者：馬志剛
蘋果昨午4時在Apple Online Store突然開售全新iPad mini Retina版本，售3,088元至6,488元，有別以往先接受iReserve預約購買的發售形式。一眾「果迷」準時登入，一心搶購心儀型號怕斷貨。
4G版較搶手料賺500元
但今次蘋果預備貨量似乎相當充足，至下午5時仍然齊貨，全數在五至十個工作天內能出貨，約一個半小時後，4G版本各儲存容量型號才率先截單，網上顯示「暫無供應」。不過WiFi版本的iPad mini Retina，至晚上10時仍長賣長有。旺角先達廣場G-World Mobile負責人劉志剛表示，去年iPad第四代與iPad mini同步推出，以體積較小的iPad mini較受歡迎。加上早前iPad Air瞬間變蟹貨，估計iPad mini Retina更有「鑊氣」，炒賣期會較iPad Air長。他提醒「果農」們新iPad mini以4G版本較搶手，每部水位約100至500元不等；WiFi版則只有16GB型號較好，其餘型號「冇乜錢賺」。
「大陸客反而會搵舊貨」
先達樂天科技負責人Carmen卻睇淡新機炒風，反覆表明「好窄、唔太睇好、麻麻哋」，苦笑指即使今日有貨，也只會以低於正價100至200元收機，指如果有得炒，早已有人問價，「咁耐以嚟得兩個大陸客嚟問，大陸都唔睇好，反而佢哋會搵舊貨」，至於早前的iPad Air則更慘烈，她甚少收機，即使成交也低過正價300元，「果農」要小心「炒燶機」。
另有消息傳出，昨晚個別連鎖電器舖的部份分店也有新iPad mini Retina供應，齊備4G、WiFi版本，不過貨量不多，各型號價錢劃一貴400元，加一元即「送」iPad mini套。不過，豐澤及百老滙店員否認有售。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange