個市狂吹無定向風，加埋沙塵暴，能見度極低。揸車遇上如此情況，為安全計都會慢開。炒股都係一樣，睇唔清前面係點，惟有一動不如一靜，只要隻股唔係跌穿重要支持位，毋須理會短期波動。先立於不敗，市好再進攻。
金山軟件（3888）公佈第三季業績，純利1.63億人仔，按年增長51%，但較第二季僅升12%，表現一般。整體毛利率為86%，較上季微跌1個百分點。
分部去睇，上季遊戲業務賺2.71億人仔，日均最高同步用戶人數為61萬，均為按季持平。值得注意，每月平均付費賬戶按季下滑11%至179萬，按年亦僅升17%，主要受越南《劍俠世界》月均付費賬戶減少影響。手遊業務仍在開發階段，距離貢獻盈利仍有一段時間，而網遊業務似乎已達樽頸位，是前景一大隱憂。
季內亮點為應用軟件業務，按季增長23%至2.7億人仔，中央推動企業用正版辦公室及防毒軟件，是未來數季增長動力。財務狀況理想，現金較去年底升64%至39.7億人仔，流動資產淨額38.3億元。
估值方面，樂觀當全年每股盈利為60分，折合75港仙，預測PE為25.3倍，勉強屬合理；但如按彭博預測，預測每股盈利僅69.7港仙，預測PE則為27.9倍，對增長放緩股份而言屬偏貴。有貨戰友宜略為減磅，降低風險。
魏力
http://www.facebook.com/2012jason
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24