又發夢、又自問自答，瞓身力撐阿里巴巴上市嘅港交所（388）CEO李小加，噚日現身上市儀式，望落成個人清減不少，可惜連個樣都殘埋，一對熊貓眼就快拍得住當年董伯伯，唔通一隻阿里真係令到小加承受咁大壓力？聞說佢喺港交所工作四年，瘦咗廿磅呀。
李小加同阿里創辦人馬雲近排頻頻隔空傳情，李小加連寫兩大篇網誌力撐創新科技公司上市，馬雲就話對香港感情好啲，顯然就係好想來港上市啦。
撐阿里來港太操勞
李小加噚日冇出差，又得閒，於是現身上市儀式，早有準備又會被人問到阿里，佢話𠵱家上市委員會搞緊創新科技公司上市豁免嘅諮詢工作，拋低金句「謀事在人，成事在天」，仲好瀟灑咁話，屬於香港嘅嘢，就自然唔會走喎。
雖然李小加依然係談笑風生，但望落似乎比起幾個月前出席H股20周年活動時清減唔少，而且唔知係咪捱得好辛苦，個樣好似殘咗好多。拎番2010年初佢返工冇耐嘅相來睇，當年佢塊面圓碌碌，精神飽滿好多。
聞說，李小加呢四年瘦咗大約10公斤，即係廿磅有多，不過就唔係有乜大病，只係佢工作似蜜蜂，又鍾意踢波，成日做運動，加上平時小心控制飲食，咁就瘦晒嘞。
李小加呢四年都真係推出唔少新政，包括人民幣股份交易平台、延長交易時間、夜期，又豪花過百億收購LME，每單都有爭議性，近排又話要為創新科技公司上市搞豁免條款諮詢，呢個諮詢一推出，肯定惹來市場各方人士批評，李小加應該可以再瘦多十磅、八磅。
李華華
mailto:[email protected]
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24