黛麗斯（333）首季經營狀況大賣復蘇概念，股價四日最多升38%，牛氣迫人，擁有自家品牌嘅安莉芳（1388），業績及財務狀況更勝黛麗斯，挾着基金頻增持、網購概念勁及圖表走勢佳三大概念，絕對有機會後來居上。
安莉芳主要產銷女性內衣，旗下品牌多籮籮，包括安莉芳、芬狄詩及COMFIT等，因此毛利率長期高於80%，近四年盈利亦保持雙位數增長。業績如此穩健，因此獲得歐洲股神青睞。佢主理嘅富達基金，由8月起密密掃貨，最新持股達9%，以佢今年無寶不落嘅絕佳成績，相信冇五成升幅唔會收貨。
安莉芳中期業績透露，網上銷售生意狂升1.5倍，佔總營業額雖僅4%，但亦意味潛力未盡反映，剛過去嘅光棍節火爆銷情，安莉芳肯定受惠，亦將成為業績嘅新引擎。
安莉芳5月曾炒高至5.41元，其後逐步回落，並形成大三角形走勢，現已行至末端，意味爆邊在即，相信黛麗斯炒作完畢後，資金將會重新注視安莉芳呢隻績優股。事實上，安莉芳三大股東共持3.4億股，再扣除部份基金持股，相信街貨只得數千萬股，一旦有資金追捧，喺貨源歸邊下，要炒上話都冇咁易。現價4.93元上車，中線博見六字頭，潛在升幅逾兩成。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange