雙十一光棍節，互聯網天王阿里巴巴又再飛龍在天，淘寶加天貓，第一分鐘就促成1億人仔成交，唔夠6分鐘就有10億人仔成交，比上年半個鐘先夠10億人仔快咗好多。光棍節網購再次證明科網股神話未滅，最緊要係睇你買乜嘢——硬件、軟件、社交網絡定係乜嘢，因為你落錯注碼，喺互聯網世界，一嘢就可以掃埋你一邊，收到未？
國策支持 炒風未完
外圍股市越做越好，數據又好過預期，央行又減息，似乎退市感越來越濃厚！大家都喺度等緊三中全會有乜嘢好方向，等大家炒一炒！
你問我，我一定首推Pro J嘅愛股——北控水務（371），有追Pro J嘅朋友，就記得Pro J喺兩個幾嘅時候就開始叫人買。呢隻股係Pro J嘅老友記、人稱「金融版浩克」嘅姜哥仔提供。一方面，facebook度有朋友瘋傳，話一日飲一公升水會後生十年，可見飲多啲水係幾咁重要。另一方面，阿爺宣佈一系列改革，又話要提升城市水務基建，又話改排水標準，政策因素fit晒嘅北控水務，擁有全國網絡同無得頂嘅融資渠道，喺咁多天時地利人和嘅因素下，梗係同王力宏隻歌——「火力全開」一樣啦！
Pro J計過，就算唔計注入新嘅產能業務，由2012至2015年，產能複合增長差唔多有30%，資債比率差唔多100%，不過，當隻股啱國情，而且又有大行關注，負債就會成為加速擴張無可避免嘅藉口！加多句有國企背景，即係有事阿爺揹啦！咁樣佢可以再加大負債，而且又唔會俾人話！加上有馬拉主權基金喺2.95元入咗場，呢種基金睇中長線，既穩健又唔死得！
Pro J名句，繼續追蹤，出發！
徐燦傑
中國銀河國際財富管理主管
本欄逢周三刊出
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24