海迪上周同一間內地百貨公司管理層食lunch，講起現時好多地區，百貨業都出現供過於求嘅問題。如果百貨公司想進入更低端嘅城市搵生意，除了管理上好考功夫之外，定位、產品組合方面，其實都唔係咁易做。
反而，近年業界多留意另一類有潛力嘅市場──就係一線城市周邊地帶。佢舉例，好似距離北京只有約30公里遠嘅燕郊咁，近年唔少北京人移居，又有外省人搬入黎，人口增長好快。而當地居民大多都喺北京工作，消費能力其實唔低，只係貪樓價、租金平，所以搬咗入去，每朝搭1個多鐘頭車出去返工。
瑞銀上星期出咗份報告，就提出「1.5線城市」（Tier 1.5 city）嘅概念。界定呢類周邊城市為人口約250至500萬、距離一線城市中心約15至40公里，例如深圳寶安、上海松江咁。
該行又形容，呢類周邊城市嘅居民收入一啲都唔低，有45%居民月入喺5,000蚊人仔或以上，和一線城市比較，其實相差無幾，但係零售商開舖嘅密度，就遠遠低於市中心。
呢種慢慢隨住城鎮化發展、逐漸出現嘅衛星城市，不久將來，可能會係零售商透吓氣嘅地方。
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange