忠實「梁粉」蔡涯棉早前被傳加入長實（001）幫超人打工，噚日澄清係轉投李兆基（四叔）懷抱，加入恒基（中國）投資擔任董事，唔入恒基地產（012）董事會，主力幫恒地搞內地樓盤銷售同土地買賣，本周四（14日）正式履新。
蔡涯棉將會保留其他公職，包括長策會委員，佢話唔怕任何利益衝突，日後訪問，記得問佢戴邊頂帽就得。至於佢創辦嘅置業國際，佢只任非執行主席，主席一職由拍檔姜樹榮接任。
今次由老闆轉做打工仔，佢話係因為早前幫恒地喺內地搞樓盤工作，識咗四叔大仔李家傑，對方親自招攬。佢亦好鍾意做嘢，唔想咁快退休，於是應承。呢份工冇話駐守內地邊個省市，唔似得香港有幾個特定樓盤，總之全中國四圍飛。不過點辛苦都唔及CY，佢話：「同CY合作咁耐，（CY）白頭髮多咗！憔悴咗！」
身兼長策會委員，講完動向，順便為樓市把脈，佢指尖沙嘴天璽加價再賣都有人承接，反映一手樓已尋底。至於二手樓，買家唔敢買，業主唔敢賣，相信未來三個月會再跌6%至8%。
足本收睇《亂噏24》x楊千嬅；緊接落嚟 Miriam繼續同你談談情,吹吹水！
周一至周五《亂噏24》約定你： http://bit.ly/appletalk24