淘寶噚日舉行光棍節大減價，激發大家衝上網購物嘅意欲，查實𠵱家除咗普羅大眾，上流社會亦興起網購，唔少名媛鍾意上外國網站買名牌衣物，由幾千蚊休閒服，到幾萬蚊晚裝都會網購，貪佢唔使限時限刻夠方便。
名媛李桂蘭4年前開始網購，𠵱家都好少行街濕平，最鍾意幫襯net-a-porter、shopbop、matchesfashion等網站。同普通女人一樣，佢都鍾意買嘢買得抵，佢話上網買同一件名牌衫，較直接去名店買便宜25%左右，對方起碼唔使交租，慳番呢筆成本。雖然話抵，佢都試過10萬蚊網購名牌晚裝。
選用打回頭免費網站
而且佢成日濕平，發覺越來越冇新意，「女仔（銷售員）畀你試衫，試完唔買好似唔好意思，但係我有好多衫都着過」，網購嘅話，佢就可以比較自在，鍾意就買，運到來唔鍾意就打回頭。所以，佢會選用打回頭免費同免稅嘅網站。
「恒生新抱」何倍倩育有三名子女，又有自己生意，冇時間行街濕平，佢話𠵱家主要網購買衫，推介shopstyle，話呢個網站可以幫人格價㖭。佢笑言，網購唯一麻煩係唔一定啱身，總有少少位唔啱，要搵相熟裁縫改衫。
無論休閒服或者晚裝，佢都會網購，前者每次消費幾千蚊，後者就上萬元。佢話越來越多外國百貨公司落本加強全球物流運輸，令佢哋網購越來越方便，好多仲出埋apps，佢哋拎住部手機已經可以落單，仲可以影低張相同朋友分享，感覺同一齊行街差唔多。
所以話，網購嘅威力幾大！
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange