特首CY話因為避免「過度競爭」影響電視市場，所以唔發牌畀王維基。說起來冠冕堂皇，不過香港一直係市場主導經濟，競爭係惡性或良性都好，都應由市場決定輸家誰屬，而非喺競爭未出現之前，就由政府決定誰要出局。
有競爭先有進步呢句說話幾時都啱。學蔡瀾話齋，食物如果冇母親煮畀兒女食嘅心思就係飼料。所以以前去Neway唱K Buffet，都抱住食飼料嘅心情，唔會對食物質素有任何期望。
點知周末期間應朋友要求，喺apm Neway再試K buffet，味道竟然可以用好食去形容。相信咁係源於出名嘢食好味嘅Red MR突襲，打破Neway壟斷局面帶來嘅後果。Neway為咗搶客，更加推出唔少優惠。
除咗Red MR，阿信屋同樣係搞局成功一大例子。最近母公司CEC國際（759）炒起，主要因為阿信屋將賣化妝品，不過菲菲同老闆傾過，佢形容今次係純實驗性質，做唔做大都要9個月後再算。
唔少人都會擔心，阿信屋會唔會做大咗就加價。菲菲覺得呢個可能性暫時好低，「良心企業」係阿信屋嘅上位原因，如果呢個招牌被打爛，冇後台嘅佢好易俾對手反擊，所以公司只可以薄利多銷。所以話呢，引入競爭絕對係市民之福。
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange