直資名校拔萃男書院嘅新學生宿舍2008年落成，位處加多利山山頂，可飽覽九龍北、東同南面270°美景；西面就俾帝京酒店阻住，冇風景，但近期就有春光，仲好富教育性，幫班仲未發育嘅男拔仔上咗堂愛之初體驗。
話說上月底男拔安排咗十幾個附屬小學嘅同學仔去宿舍住宿四晚，體驗寄宿生活。和尚寺向來悶悶地，住宿舍又要循規蹈矩，本來就冇乜嘢特別，但喺24號當晚近9點，一名學生行過走廊，望向帝京方向突然發現「亮點」，有一間房開住燈、而又冇拉埋窗簾。嘩，不得了，有對男女剝晒衫褲剝晒鞋，光脫脫做緊乜嘢，八方唔使畫公仔畫出腸啦吓。
拉大隊睇足十幾分鐘
拔仔好講brotherhood，呢位同學仔唔獨食，即刻返去叫埋其他住宿同學，一齊過嚟窺一窺，悶中作樂。據知佢哋睇咗十幾分鐘先散band，所以呢堂真人性教育應有唔少得着。佢哋第二日返小學部上堂時，仲同冇機會欣賞到嘅同學仔分享，點知傳到老師耳邊，結果就被召見，叫佢哋唔好再講喇。
據知，當晚冇拉簾表演真人騷嘅係一對外籍男女；不過有學生向老師話，只係見到個男人冇着上衣啫。其實呢座宿舍房間面向南同北，夜晚又比較早閂燈，酒店住客未必知道有學生喺度住，所以唔知冇拉窗簾會搞到春光乍洩都唔奇。
男拔宿舍目前只係畀中學部學生申請留宿，每年宿費要52,500蚊。校方話，舊年開始安排小六學生分批到宿舍體驗寄宿生活，嚟緊仲會有，校方一早知悉今次學生睇到酒店春光事件，已作適當處理，並有通知家長，絕冇隱瞞。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange